MWEN TA VLE WE YON 18 ME

Mwen ta vle wè yon 18 me!

Kote moun pap chanje pwofil paske se dat 18 nan mwa me
Men paske panse a drapo w’ ranpli nanm ou ak fyèteKote Fanfa pap pran lari akoz se yon woutin
Men paske chante se kle rezistans nou gen nan konba yo ak pi bon zoutin
Kote Jèn fi pa pral brase ren pou resevwa gwo bri ak bravo
Men paske klèwon ak LAnbi te sifi pou zansèt yo te rele Grenadye Alaso!

Mwen ta vle wè yon 18 me!
Kote mwen wè lari a pwòp pa sèlman de pil fatra
Men de tout timoun san fanmi kap rale tinè nan moso twal dra
Kote Ayisiyen pa vle di sida(4H), Twou Kaka ni maldito diablo
men nèg vanyan ki te ede America Latino ak Repiblik Petro
Kote Timoun pa nan koze ti sourit, rabòday ak pete chawa
Men pou yo gen lanmou pou jwe, sotekòd, teke mab ak boul chawa!

Mwen ta vle wè yon 18 me!
Kote tout rèv yon Ayisyen se pa sèlman pati al travay e redi nan fredi Chili
Men se pou al konekte ak lòt kilti pou aprann kreye plis opòtinite pou sak pi piti
Kote fè politik pa sèl mwayen ki gen pou yon moun fè lajan oubyen pou santiw reyisi
Men pou li tounen yon espas kote lanmou ak Entegrite vle fè yo sèvi
Kote koze pale de Ayiti se peyi pòv la pa ekri nan figi lamas nwa
Men pou nou konprann se paske depi nan digdantan peyi sa gen twòp klan, gwoup ak klas!

Mwen Kwè map wè yon fèt drapo kote n’ap santi nou fè de ti bout tè sa lonbrit nou mare e antere la
E se tè kite boujonnen Desalin, Tousen, Kristòf ak lòt brav yo ke kòsmòs la te chwazi anjedre la!

Fred E. StJust

Facebook Comments